Cursos de formación presenciais e na rede
Está aberto o prazo de inscrición para os cursos de A hora (agricltura ecolóxica), Internet Explorer, Contabilidade para peme's e contaplús e Percusión e ritmo corporal que empezarán en febreiro e marzo.
Tamén puxemos en marcha a oferta de formación on-line con máis de 20 cursos. Neste momento estamos totalmente desbordados (mira ti, tres anos facendo formación na rede sen éxito e agora de pronto...) co que imos ter que ilos facendo de xeito paulatino a partir de finais de febreiro, pero podes apuntarte igual.
E como o prometido é débeda, xa temos colgados na web os trípticos de formación, por un lado o tríptico da programación do ano 2010 e por outro un específico de xaneiro a abril. O enlace é www.concellodebrion.org/formacion.
 Outra nova de interese relacionada ca formación é que xa abrimos o prazo para inscribirse nos cursos do CELGA. Se vós ou alguén que coñezades está interesado en presentarse ás probas do CELGA e quere facer o curso tedes ata o 25 de febreiro para chamar e apuntarvos.
E xa para rematar, se estades interesados en cursos de formación ocupacional acaba de saír a convocatoria e xa se sabe qué cursos se van facer este ano dos do Plan FIP (agora xa non se chama así pero é para entendernos). Para Brión solicitamos o de "Empregado de oficina", a ver se este ano nolo conceden. Se vos interesa esta formación, só para desempregados, este é o momento de apuntarse. Empezarán a partir de marzo ou abril, así que se queredes acceder á fase de selección tedes que estar apuntados para os cursos concretos que vos interesen antes desas datas.
ENTROIDO: obradoiros e festa de piñata
 Pero non todo vai ser facer cursos este mes. Tamén teremos festa, por algo este é o mes do Antroido/Entroido. En Brión teremos por un lado obradoiros para os rapaces de 3 a 12 anos e xa o domingo 21 de febreiro a festa de Antroido con desfile desde a Carballeira a partir das 4.30. Haberá premios nas categorías de infantil, xuvenil, adultos, grupos, comparsas e carrozas. E todo amenizado pola orquestra Os Satélites.
Novos valores 10. Exposición
O día 12 de febreiro será a entrega de premios e inauguración da exposición das obras que se presentaron este ano ó concurso de pintura Novos Valores. A entrega de premios será o venres 12 ás 8.30 da tarde no Espazo das Artes (planta de arriba da Escola de Música) e ó remate inaugurarase a exposición.
Sendeirismo: Ruta da Rubial
Xa vén o bo tempo e o departamento de deportes do Concello de Brión empeza a súa campaña de sendeirismo. Coma sempre empezamos no noso propio concello, este ano ca subida ó monte da Rubial.
A ruta é o día 27 de febreiro. Sairemos ás 3 e media da tarde do adro da Igrexa dos Ánxeles. A ruta dura entre 4 e 5 horas, é un pouco dura nalgún tramo pero vale a pena, hai unhas vistas impresionantes desde alá arriba!
|
ARTERIA NOROESTE organiza para os meses de febreiro e marzo cursos de formación relacionados todos co mundo do audiovisual (vídeo dixital, photoshop, postproducción dixital con After-Effects, secuenciación MIDI, estudio de gravación personal, efectos especiais...) 
Cada semana Arteria Noroeste vai informando das actividades que ten programadas.
Vén o bo tempo e queríamos poñer outra vez en marcha o voluntariado ambiental.
A Dirección Xeral de Xuventude e Voluntariado e a S.A. de Xestión do Plan Xacobeo poñen en marcha o Voluntariado Xacobeo 2010 que se desenvolverá durante o vindeiro Ano Santo ao longo dos 9 Camiños de Santiago.